Што пишува во официјалниот извешај за хеморагичната треска во Симница?

Институтот за јавно здравје го објави месечниот извештај за заразните заболувања во Македонија за јули. Во него се наведени и податоци за појавата на хеморагична треска во гостиварското село Симница, од кое заболување двајца жители починаа. Извештајот содржи информации за заболените пациенти, преземените мерки и слично, но нема податок како, односно преку што дошло до заразата.

Го пренесуваме напишаното: „На 28.07.2017 година, Центарот за јавно здравје Тетово/Подрачна Единица Гостивар пријави епидемија на хеморагична треска со бубрежен синдром, предизвикана од Ханта вирус. Епидемијата е регистрирана на територија на село Симница, Гостиварско со три заболени лица од кои две лица се починати и 7 сомнителни лица, сите хоспитализирани на Клиниката за инфективни болести. Епидемиолошката анкета укажува дека сите заболени лица работеле како овчари на исто бачило над месноста Стража. ЦЈЗ Тетово и ПЕ Гостивар во соработка со ИЈЗ и Државниот санитарен инспекторат извршија санитарно-хигиенски и епидемиолошки увиди и во селото Симница и во бачилото. При увидот се препорачани и превземени соодветни мерки: дератизација и дезинфекција во селото, бачилото и нивната околина, едукација на вработените во бачилото за превентивните мерки за заштита. Дополнително при увидот наложено е да се спроведат и други санитарно хигиенски мерки поврзани со консумирање на безбедна вода и соодветно отстранување на отпадот. Исто така изготвени се и поделени информативни материјали за здравствени работници и за население, а истите се поставени на веб страната на ИЈЗ“.