Шверц комерц! Царина „улови“ 28.000 евра, над 200 штеки цигари, играчки, автоделови…

Цариската управа информираше дека во текот на изминатите две недели, царинските службеници откриле повеќе обиди за криумчарење на разна стока и девизи.

20.000 евра биле откриени од страна на мобилните царински тимови, при личен претрес на двајца српски државјани, кои со српски автомобил се пријавиле за излез од државата на граничниот премин Табановце автопат. 8.550 евра, биле откриени при контрола на украински автомобил, со кој за влез во државата на граничниот премин Богородица се пријавиле тројца украински државјани.

137 штеки цигари марка Camel Blue со македонски акцизни маркички, биле откриени на Интернационалниот Аеродром Скопје, при контрола на рачниот багаж на државјанин на Латвија, кој имал намера да отпатува со лет за Лондон. 76 штеки цигари марка PALL MALL и Chesterfield со македонски акцизни маркички, биле откриени при контрола на албански камион управуван од македонски државјанин, пријавен за излез од државата на граничниот премин Табановце автопат.

134 употребувани и нови автоделови за патнички возила марка VW Golf (ламели, летви, клапни за карбуратори, пумпи за гориво, шепи за кочници, инструмент табли и турбини), биле откриени при контрола на германски автомобил со кој за влез во државата на граничниот премин Табановце автопат, се пријавиле двајца македонски државјани.

Царинарниците откриле и обид за криумчарење на играчки, облека, бижутерија, делови за мобилни телефони, велосипеди

Од страна на мобилните царински тимови во  пет одвоени случаи биле откриени 813 парчиња облека, 22 пара обувки, 415 детски играчки, 150 пара очила за сонце,  80 батерии и 6 велосипеди.

460 парчиња бижутерија (прстени, обетки, алки, синџирчиња и шноли), 229 делови за мобилни телефони (заштитни стакла, футроли, слушалки и полначи), 195 пара очила за сонце и 36 приврзоци за клучеви, биле откриени при контрола на македонски автомобил, управуван од македонски државјанин, пријавен за влез во државата на граничниот премин Блаце.

203.000 парчиња семиња за земјоделски култури (домати, зелка, карфиол, брокула, морков и диња) со вкупна проценета вредност од околу 324 илјади денари, биле откриени при контрола на косовски автомобил, управуван од косовски државјанин, пријавен за влез во државата на граничниот премин Богородица.

200 парчиња катетери марка Coloplast, биле откриени на Интернационалниот Аеродром Скопје, при рентгенска контрола на багажот на хрватски државјанин, кој допатувал со лет од Загреб.

Мобилните царински тимови, во два одвоени случаи, при контрола на две комбиња пријавени за излез од државата на граничниот премин Табановце автопат, откриле  специјално конструиран бункер и една бугарска патна исправа за која постои сомневање дека е фалсификувана.

Во првиот случај, при контрола на товарно комбе со фински регистарски таблички, управувано од државјанин на Ирак, позади кабината во товарниот дел бил откриен влез во специјално конструиран бункер поврзан со кровниот дел на комбето.  Комбето е привремено задржано, а против возачот е поднесено барање за поведување прекршочна пријава.

Во вториот случај, при личен претрес на македонски државјанин, патник во  македонско патничко комбе, во неговата рачна торбичка била пронајдена бугарска патна исправа на сосема друго име, издадена од МВР Софија, од која биле искинати неколку страници. Поради сомневање дека се работи за фалсификувана патна исправа, случајот е предаден на Министерството за внатрешни работи за понатамошна постапка, соопшти Царинската управа..