Сите пријави на 192 од вчера стигнуваат во новиот полициски Центар за известување и координирање

Секторот за внатрешни работи Тетово новата година ја стартуваше со формирање на Центар за известување и координирање, каде се примаат сите пријави од граѓаните од полошкиот регион за  безбедносни настани и појави.

„Граѓаните можат да го добијат Центарот 24 часа, нон-стоп, со бирање на бесплатниот телефонски број 192, по што пријавата се проследува до полициската станица или одделение на чие подрачје е случен настанот што се пријавува. И не само тоа, туку и од почеток до крај се коодинираат сите потребни и преземени мерки и активности кои се однесуваат на пријавениот настан. На овој начин граѓаните, каде и да се наоѓаат на тетовско-гостиварското подрачје, во Центарот можат да пријават настан и да не губат време, што е мошне значајно во одредени ситуации, во кои неретко  одлучуваат минути, па дури и секунди“, соопштија од СВР Тетово потенцирајќи дека отворањето на новиот Центар не значи дека пријави нема да се примаат како и до сега и во Полициските станици.

Надлежните сметаат дека новоформираниот Центар за известување и координирање на ќе  придонесе за брзо и ефикасно примање на пријавите од граѓаните и за нивно практично, професионално расветлување.