Социјално загрозените и невработените ќе добијат платежна картичка од 9.000 денари

Техничкиот премиер Оливер Спасовски одржа прес конференција на која ги претстави новите економски мерки од третиот сет.

„Како дирекна финансика поддршка на граѓаните со фокус на домашните продизводи воведуваме платежни картички за граѓаните. Околу 100.000 граѓани ќе добијат платежни картички со 9.000 денари за македонски производи и услуги. Тоа е наменето за невработени лица, баратели на работа, кои немаат над 15 илјади денари месечно приход и корисниците на гарантираната минимална помош. Исто така, околу 100.000 ќе добијат ваучер за домашен туризам од 6.000 денари и домашна платежна картичка од 3.000 денари, со тоа ќе го зајакнеме домашниот туризам. Ова е наменето за сите вработени кои примаат нето плата помала од 15.000 денари и немале други приходи.“, информираше Спасовски.

Со третиот сет мерки се воведува и платежна картичка од 3.000 денари и кофинансирање на обуки за ит вештини, како поддршка за младите лица.

„Ако со првите два сета економски мерки го ублажувавме одразот на здравствената криза врз економијата, третиот сет мерки кои денес ги усвои Владата, се однесуваат на ревитализацијата на економијата и стимулирање на потрошувачката. Се однесуваат на дирекна помош од државата и на гаѓаните и стопанството. Се поддржуваат сите категории, социјално ранливите граѓани и бизнисите. Се наградуваат лекарите и медицинскиот персонал на инфективните одделенија. Овие мерки ќе овозможат заживување на македонската економија.“, рече Спасовски.

Вредноста на мерките изнесува 355 милиони евра, ќе бидат опфатени вкупно 730 илјади корисници.