Сојуз на синдикати: Работодавачите да го исплатат регресот до крај на годината

Сојузот на синдикатите на Македонија преку соопштение ги повика работодавачите да им исплатат регрес за годишен одмор на работниците до крајот на годината, како што предвидуваат правилата.

„Регресот за годишен одмор е  право воспоставено по пат на дијалог помеѓу претставниците на работниците во конкретниот случај  Сојузот на синдикатите на Македонија  и од претставниците на работодавачите – ОРМ и со оглед на тоа што се работи за право уредено спогодбено  со потпишување на колективен договор, очекувано е работодавачите целосно да ја исполнат обврската која доброволно ја презеле. Согласно член 35 од ОКД за приватниот сектор од областа на стопанството регресот  за годишен одмор се исплатува во  висина  од најмалку  40% од основицата,  под услов работникот  да работел најмалку 6 месеци во календарската година кај ист работодавач. Основицата за пресметување на надоместоците на работниците преставува просечната месечна нето плата по работник во Република Македонија исплатена во последните три месеци.“, стои во соопштението на ССМ.

Службите за бесплатна правна помош на ССМ во Скопје и во регионалните синдикални претставништва низ Републиката за своето членство обезбедуваат правна помош и заштита и ова право на работниците.

За неодговорните  работодавачи кои не исплаќаат регрес за годишен одмор  или бараат од работниците  да ги  вратат исплатените средства по овој основ,  Кривичниот закон предвидува затворската казна до 1 година. Казна затвор од 3 месеци до една година е предвидена и за работовадачите кои ќе побараат од работник да им врати или ќе примат одреден износ од плата или други надоместоци.

„На работниците на кои нема да им биде исплатен  регресот за годишен одмор им укажуваме дека можат да побараат интервенција од  Државниот инспекторат за труд , или пак да покренат судска постапка за заштита на своите права.“, наведува Сојузот на синдикати.