Сопственикот на Дурмо Турс и возачот на автобусот од затворски одат во домашен притвор

Судија на претходна постапка во скопскиот кривичен суд деновиве донел одлука, сопственикот на „Дурмо Турс“ и возачот на автобусот во несреќата кај Ласкарци, од затворски да одат во домашен притвор. Како што јавува 1ТВ на ваквото решение скопското обвинителство поднело жалба, во која е наведено дека нема правна логика, тој што носи притворски решенија до 30 дена, да одлучува и за укинување и носење поблаги мерки.

Телевизијата пренесува став на кривичниот суд во кој стои дека судија на претходна постапка заради влошена здравствена состојба ги ублажил мерките од затворски во домашен притвор, а конечната одлука ќе ја има кривичен совет на скопска „единица“, до каде ОЈО се жали.

Обвинителството претходно бараше да им биде продолжен притворот на тројцата осомничени, сопственикот, возачот и раководителот на компанијата, како и куќниот притвор на уште тројца осомничени. За седмиот осомничен беа побарани и определни мерки за претпазливост.

Кобната несреќа се случи на 13 февруари годинава, кога автобус на „Дурмо турс“ излета од патот Тетово-Скопје и падна во провалија и се преврте. Несреќата однесе 16 жртви и над 30 повредени.