Совет Гостивар: Усвоени одлуки за легализација, финансии, работа на ЈП за паркинг и зеленило

Без многу дискусии и образложенија, со усвојување на сите точки од дневниот ред, помина денешната седница на Советот на Општина Гостивар. Најмногу одлуки беа донесени од сферата на урбанизмот, односно легализацијата на бесправно изградени објекти. Десетина од нив опфаќаат донесување на урбанистичко планска документација за џамии низ села на гостиварска територија и тоа: Речане, Равен, Вруток, Ѓоновица, Србиново, Беловиште и други. Се изгласаа и петнаесетина одлуки  за легализирање на објекти во приватна сопственост.

Советот усвои и измена и дополнување на годишната Програма на ЈП за паркинг и зеленило и финансиски извештај на претпријатието, кои беа ставени како дополнителни точки.

„Управниот одбор на претпријатието донесе одлука за изменување и дополнување на Програмата, од причина што освен претходно зацртаните работи и проекти, во текот на оваа година сме реализирале и дополнителни инвестиции, градење на нови зелени површини низ селата и нивно одржување“, рече Беким Челебиу, директор на ЈП за паркинг и зеленило.

Мнозинството не гласаше за предлогот на Насир Муслиу од ДУИ, на дневен ред да се стави и предлог-одлука со која МВР повеќе нема да го користи објектот на некогашната општина Чегране, како Полициска станица.

Советниците ја поддржаа прераспределбата на средствата во Буџетот на Општина Гостивар.