Старо Чајле – Возач удрил во седумгодишно девојче и побегнал

Регистрирана е нова сообраќајна несреќа со повреден пешак. Се случила околу 13 часот во Старо Чајле.

Според информациите од полицијата, за сега непознато возило удрило во седумгодишно девојче, по што веднаш го напуштило местото на настанот. Девојчето се здобило со тешки телесни повреди (фрактура на десната потколеница) и било пренесено во гостиварската болница. По укажаната лекарска помош, било префрлено на скопските клиники. По овластување на Јавен обвинител, полициски екипи вршат увид на местото на несреќата. Од полицијата соопштуваат дека преземаат мерки за пронаоѓање на возачот и возилото и за расветлување на сите поединости околу несреќата.

Надлежните укажуваат на зачестени несреќи со повредени пешаци на гостиварското подрачје. Апелираат до возачите и до самите пешаци да ги почитуваат правилата, за да се избегнат несакани последици, особено низ улиците во населените места каде ризикот некој да настрада е голем.