Старт на учебната година во Гостивар: Струја има, согласности за вработувања нема

Првото училишно ѕвонче заѕвони во сите основни и средни училишта на подрачјето на општина Гостивар. Околу 6.600 основци и 3.040 средношколци седнаа во училишните клупи.

Дел од проблемите на кои изминатите денови се пожалија директори на неколку училишта во Гостивар, се надминати, но училишните управи повторија дека новата учебна година не стартуваше безгрижно. Училиштата добија електрична енергија, а останаа без согласностите за вработување на кадарот кој е ангажиран со договор. Две училишта, гимназијата и ОУ„Исмаил Ќемали“ влегуваат во учебната 2018-2019-та со блокирани жиро сметки поради долгови кон фирми.

Според локалната власт, учебната година почнала без пречки.  Од општината информираа дека до управите испратиле писмени дописи со препораки за постапување по ангажираните на определено време.

Оваа година во гостиварските училишта запишани се вкупно 613 првачиња на трите наставни јазици: македонски, албански и турски. За првпат пак, во средношколските клупи седнуваат 677 ученици.