Стартува пријавувањето за субвенции за одмор за семејствата со ниски примања

Започнува пријавувањето за субвенции за одмор на работници со ниски приходи, чии месечни примања во семејството не го надминуваат нето износот од 22.000 денари. Оваа мерка се спроведува во рамки на  Програмата за домашен туризам за работници со ниски приходи 2019 година.

„Со оглед на зголемениот интерес на граѓаните, и оваа година ќе продолжиме со мерката преку која на работниците со ниски примања им се овозможува користење на годишен одмор. Владата на Република Северна Македонија  преку програмата на Министерството за економија,  во 2017 година  почна да ја спороведува  оваа мерка со цел да даде подршка на домашниот туризам, но во исто време на семејствата со ниски месечни примања да користат одмор во туристичките центри во земјата“, изјави министерот за економија, Кресник Бектеши.

Во 2018 година над 1.700 семејства искористиле одмор во туристичките места низ државата, а според податоците на Министерството, најпосетени биле Охрид, Попова Шапка, Маврово, Берово.

„Оваа година издвоивме 20.000.000 денари за оваа цел, така што сите вработени кои ги исполнуваат условите месечните примања во семејството да не надминуваат нето приход од вкупно 22.000 денари, ќе имаат право на субвенции од 15.000 денари. Корисниците на овие ваучери ќе имаат на располагање голем број категоризирани хотели во земјата за сместување кои се претходно пријавени во Министерството за економија и со кои имаме склучено Договор за соработка“, истакна Бектеши.

Јавниот повик ќе трае до 30 август, додека користењето на годишниот одмор ќе може да се реализира најдоцна до 30 ноември 2019 година. Деталите околу пријавувањето и документите заинтересираните може да ги добијат во Министерството за економија.