Страшно – Огнови ги голтаат шумите во гостиварско, месецов над 50 пожари

Од почетокот на овој месец, Противпожарната единица на Гостивар имала дури 57 интервенции, од кои најголемиот дел биле на гаснење на шумски и полски пожари. Дека состојбата со пожарите е алармантна, може да се потврди со споредување на податоците од лани, кога во цел месец март, пожарникарите интервенирале 16 пати.

Изминатиот викенд, за само два дена пожарникарите гаснеле дури 24 пожари.

Апели за зголемена внимателност при движење на отворен простор и работа на нивите деновиве упатуваат Противпожарната единица, полицијата, Дирекцијата за заштита и спасување и други институции, но се чини дека тие наидуваат на глуво уво.

Дека опасноста може да биде голема, кажува и примерот со пожарот во атарот на селото Здуње. Таму огнот се проширил до трафостаница и постоел ризик да ја опожари. За среќа бил угаснат. Викендот што измина, пожари имало и кај селото Митрови Крсти, како и меѓу Речане и Вруток, а голема површина беше зафатена и во близина на Куново.

Надлежните потсетуваат дека граѓанска должност на секој поединец е најбрзо што може да пријави доколку забележи пожар на отворен простор. „Од брзината на јавувањето, содржината и точноста на информациите зависи и успехот на акцијата за гасење на пожарот.“, наведуваат од Дирекцијата за заштита и спасување.