Свечена академија за прослава на Денот на општина Гостивар

Со доделување на плакети, прогласување на почесен граѓанин и културно-уметничка програма, општина Гостивар го прослави Денот на општината, 29 јуни. На Свечената академија која се одржа вчера попладне во Центарот за култура, присуствуваа високи државни и локални функционери, пратеници, претставници од верските заедници, гости од збратимените градови од Босна и Бугарија и граѓани.

Градоначалникот Невзат Бејта во својот говор се осврна на реализираните проекти во текот на изминатите година дена:

„Од јуни минатата година па досега, реализиравме над 40 проекти во инфраструктурата. Сакам да ја нагласам изградбата на новата улица и мостот на реката Вардар, како капитален проект и од витално значење за граѓаните на Гостивар и да го напоменам реасфалтирањето во населбата Дутлок. Изградивме и асфалтиравме десетици улици комплетирани со фекална и атмосферската канализација. Посебно внимание посветивме на зеленило, се засадија стотици дрвца по булеварите и главните улици на градот. Спроведовме проекти и во урбанизамот, образованието, дадовме поддршка на спортот“.

За почесен граѓанин на Гостивар, беше прогласен професорот Милаим Фејзиу, прв претседател на Сенатот на Универзитетот во Тетово. Плакети им беа доделени на младите гостиварци каратистот Берат Јакупи и инженерот Леарт Таравари.

На Свечената академија кусо обраќање имаа претседателот на Собранието на Република Македонија, Талат Џафери како и претставниците од збратимените општини Смолен (Бугарија) и Стари Град (Босна).

Културно – уметничкиот дел од програмата беше исполнет со изведба на класични дела и хорски песни.