Таравари: Бројот на пациенти со ковид е алармантен, вакцинацијата е најмоќно оружје против вирусот

Градоначалникот на Гостивар Арбен Таравари утрово упати апел до граѓаните на внимателност, оценувајќи дека состојбата со коронавирусот стана алармантна.

„Бројот на заразени со Ковид-19 ги надмина болничките капацитети. Делта сојот на овој вирус е многу позаразен, па затоа бројот на пациенти е толку алармантен! Апелирам до сите граѓани да внимаваат максимално, да ги чуваат своите животи и животите на другите! Вакцинацијата е најмоќното оружје со кое можеме да се бориме против овој страшен вирус, покрај потребната дистанца и хигиена!“, напиша градоначалникот во фејсбук статус.

Гостивар е меѓу регионите со најголем број на новозаразени со коронавирус периодов. Со вчерашните 138 нови потврдени случаи, бројот на активно болни се искачи на 776. Во ковид извештаите викендов во Гостивар беа евидентирани 5 починати.