Таравари ќе чека државна ревизија, па потоа ќе покренува кривични постапки

Градоначалникот на Гостивар Арбен Таравари денес продолжи со прес конференциите во рамки на неговата кампања „Вистината за ДУИ“. Тема на денешниот прес беше урбанизмот. Таравари посочи дека градежно земјиште било продавано по ниски цени на луѓе блиски до претходното општинско раководство. „Првиот случај се однесува на продажба на градежно земјиште во сопственост на општина Гостивар, кај градската индустриска зона, на излез од Гостивар кон Тетово. Продажбата на градежното земјиште е направено за смешни цени од 211, 500, 550 и 1.600 денари за метар квадратен.“, рече Таравари.

Како друг случај го наведе изработувањето на проекти од страна на Проектантски бироа. „Конкретно, од вкупно 46 колективни згради, едно Биро за проектирање, многу блиско до поранешниот шеф на урбанизам има изработено 16 проекти, со вкупна вредност од 329.732 евра. Едно друго биро за проектирање, за 6 изработени проекти обезбедило средства во износ од 179.334 евра“, изјави градоначалникот.

Таравари на новинарите им даде увид во документите за случите за кои зборуваше. Сепак, не сакаше јавно да ги каже имињата на сопствениците, ниту да го изговори името на поранешниот шеф на урбанизам за да како што рече, не остава простор за тужби. На новинарско прашање дали ќе бара кривична одговорност за случаите кои ги обелоденува, одговори дека најпрво ќе чека државна ревизија. „Се што зборуваме е аргументирано, затоа и сме дозирани. Некаде во април, мај во Гостивар ќе дојде државна ревизија, а после тоа ние ќе покренеме и кривична постапка против Невзат Бејта. Ние се боревме против еден режим, кој имаше две компоненти ВМРО и ДУИ од кои за жал едната остана и во новата власт и по се изгледа тоа причинува СДСМ се повеќе да личи на ВМРО. Сепак јас сум оптимист и се надевам дека правниот систем ќе функционира во Македонија“, рече градоначалникот.