Таравари: Од утре локалите може да продаваат кафе по шалтерски модел

Градоначалникот на Гостивар, Арбен Таравари информираше дека предлогот на Меѓуопштинскиот штаб, кафетериите и локалите да може да продаваат и кафе по шалтерски модел, бил прифатен од централниот кризен штаб.

„Добив информација дека нашиот предлог е прифатен од Централниот кризен штаб и одлуката ќе започне да се спроведува од утре. Ова значи дека освен храна, по моделот „Земи и оди“ ќе може да се продава и кафе, се разбира само вон полициски час“, изјави Таравари.

Градоначалникот најави дека следната недела, во својство на претседател на Меѓуопштинскиот кризен штаб – Гостивар, ќе предложи и други олеснувања до централниот штаб: да се дозволи локалите да послужуваат гости внатре, но да се обезбеди физичко растојание од 2 минимум метри, со максимум две лица седнати на иста маса.