Таравари влегува во трка за градоначалник – Бејта очекува победа

Се ситнат роковите до кога партиите треба да ги официјализираат кандидатурите за градоначалници на општините. За Гостивар до сега извесно е дека сегашниот градоначалник од ДУИ, Невзат Бејта и актуелниот министер за здравство од Алијанса на Албанците, Арбен Таравари ќе се борат за градоначалничката функција.

Таравари и неговата партија синоќа потврдија дека е избран за кандидат за прв човек на Гостивар на престојните Локални избори во октомври. „ Доаѓаат локални избори. Ние сме нова партија, релативно мала партија и сите ние што сме внатре, од претседателот Зијадин Села и јас како генерален секретар, за да им кредибилност нашата партија, за да тежи во општетсвото, за да имаме влијание во сите сегменти на животот, ќе мораме да се вратиме во базата и да добиеме поддршка од граѓаните или да не казнат за тоа како работевме, откако сме создадени како партија.  Народот на 15 октомври е тој што ќе одлучи кој треба да ја води локалната власт, а тоа ќе рефлектира нормално и на централната власт“, изјави Таравари во интервју за агенцијата Макфакс.

Бејта најави дека ќе бара нов мандат од граѓаните на Гостивар уште пред неколку месеци. Денес во изјава за медиумите рече дека ќе ги почитува, но нема да се занимава со своите политички противници и дека очекува победа.

„Со мојата екипа до сега имаме направено многу за градот. Тоа што се кандидирам повторно не е по моја желба, туку на барање на граѓаните, кои знаат да ја ценат мојата работа и заложбите на мојот тим. Од расположението кое го гледам кај нив и со измените на Изборниот законик, сметам дека ќе победиме во првиот круг“, потенцираше Бејта.

Останатите политички партии до сега немаат извадено конкретни имиња за кандидати за градоначалници за Гостивар.