Техничкото училиште во Гостивар се презентира пред полуматурантите

Во средното техничко училиште во Гостивар во пресрет на уписите на деветтоодделенците се одржуваат Отворени денови, на кои се презентираат смеровите и условите во оваа образовна установа.

Полуматурантите од гостиварските основни училишта имаат можност да се запознаат со наставните профили кои ги нуди техничкото училиште, со какви кабинети располага, каква е инфраструктурата, како се одвива практичниот дел од наставата итн.

„Чест ни е да бидеме дел од вашиот живот, од патот кој треба да го поминете во иднина. Имате шанса само со една одлука да го трасирате вашиот живот во добра насока, а тоа е стручно училиште. Ако одберете да се образувате во ОСТУ Гостивар пред се‘ ќе имате основа, темел, за понатамошно студирање на некој од техничките факултети. Предноста на нашето училиште е дека теоријата ја поврзуваме со праксата, ги следиме трендовите и имаме опремени кабинети и средства за работа.“, рече пред полуматурантите, професорката по машинство, Христина Стрезовска.

Во средното техничко училиште следната учебна година има место за 502 ученици на трите наставни јазици: македонски, албански и турски. Функционираат повеќе смерови и има повеќе образовни профили: машинска, електро-техничка, градежно-геодетски, компјутерска техника и автоматика, индустриска мехатроника.

Првото пријавување за уписите во средно е на 14 и 15 јуни.