Три рецепти за малку поинаква зимница

Сезоната на зимници е во полн ек и теглите со традиционалните ајвар, лутеница, туршија, се редат на полиците. Ако сте од оние кои се подготвени да пробуваат нови вкусови и да ја освежат домашната кујна, следните рецепти за несекојдневни и помалку познати зимници сигурно ќе ви бидат привлечни.

Салата со печурки и кисел зеленчук

Состојки:

600 гр кисела зелка

400 гр кисели краставички

300 гр печурки шампињони

100 гр кромид

100 гр масло

30 гр шеќер

Подготовка:

Сварете ги шампињоните и исецкајте ги. Исецкајте го и зеленчукот и измешајте. Зачинете со масло и шеќер. Салатата ставете ја во тегли и чувајте ја на темно и ладно место.

Салата од цвекло, моркови и јаболка

Состојки:

4 глави цвекло

4 моркови

3 јаболка

1 целер

1 цел лимон

сок од 2 лимони

6 лажици мед

Подготовка:

Зеленчукот и јаболката излупете ги и изрендајте. Лимонот измијте го убаво и исецкајте го ситно. Откако ќе ги измешате додадете го сокот од 2 лимони и медот и повторно добро  измешајте. Вака подготвената салата ставете ја во тегли и чувајте ја на ладно и темно место.

Модри сливи полнети со зелка

Состојки:

1 кг. сливи

250 гр зелка

2 лути пиперки

1 китка магдонос

1 китка нане

2 глави лук

ловоров лист

2 лажички сол

120 мл оцет

вода

Подготовка:

Исечете ја зелката на ленти или изрендајте ја. Лутите пиперки исецкајте ги ситно и додадете ги во зелката. Магдоносот и нането ситно исецкајте ги, па истото додадете го во зеленчукот. Главите од лукот исчистете ги и изрендајте ги. Посолете и сè добро измешајте. Оставете околу половина час. Засечете ги сливите и извадете ја семката, за да може да се филуваат. Наполнете ги сливите со подготвената смеса. Ставајте ги во претходно стерилизирани тегли. Во секоја тегла ставете по еден ловоров лист, сол, оцет и ладна вода. Добро затворете и ​​чувајте во фрижидер или на ладно и темно место.