Тротоарите не се изложбени места – казните за узурпација до 2.000 евра

Една куса прошетка низ Гостивар е доволна за да се забележи дека тротоарите, зеленилото и други јавни површини, поединци и фирми си ги присвојуваат и си ги претвораат во изложбени простори и пазари. Во нивната свест важи девизата „она што е јавно – е мое“, но само кога станува збор за користењето, а не и за одржувањето.  Ваквото несовесно однесување, освен што ја нагрдува сликата за градот, претставува и опасност по безбедноста, како на пример во случај со пешаците кои не можат слободно да се движат по тротоарите, па одат по улица.

Во насока на воспоставување поголем ред и безбедност на градските улици, сообраќајната полиција најавува засилени активности во периодот што следи и во текот на целото лето.

„Ќе се отстрануваат и законски ќе се санкционираат сите самоволни зафаќања – узурпации на јавните сообраќајни површини, пред се на тротоарите, зеленилото и делови од улиците. Станува збор за поставување на рекламни паноа, табли, изложување на земјоделски и други производи, како и оставање на хаварисани и возила кои се нудат на продажба, а кои го попречуваат нормалното и безбедно движење на пешаците  и ја намалуваат прегледноста“, потенцираат од Секторот за внатрешни работи. Казните за ваквите прекршоци изнесуваат 100 евра за физички лица и до 2.000 евра за правните лица.

Од полицијата велат дека посебен акцент ќе се стави и на паркирањето. Казни ќе има за возачите кои паркирале на пешачки премини, на крстосници, на кривини, пред поставени сообраќајни знаци или на велосипедски патеки, како и на стојалишта за јавен превоз и такси возила, пред влезови на објекти, пред гаражи, во зеленило и на места предвидени за лица со посебни потреби. Непрописното паркирање ги чини возачите казна од 25 до 250 евра.