Хуманитарна изведба на „Чорбаџи Теодос“ во петок

Младите актери, луѓето од културата и група гостиварци со големо срце ги здружија силите во хуманитарни цели. Во петок, во Центарот за култура „АСНОМ“ во Гостивар репризно ќе се одигра комедијата „Чорбаџи Теодос“, а собраните пари ќе бидат наменети за помош на ранливи категории граѓани.

Иницијативата ја покрена културното здружение „Дунек“, под водство на Ѓорѓи Нешкоски, кој е и режисер на претставата, а се реализира во соработка со Центарот за култура и група хуманитарци од Гостивар.

„Сметаме дека ова е убава можност да им се помогне на наши сограѓани кои се соочуваат со животни проблеми и предизвици. Очекуваме да има публика и гостиварци да покажат солидарност, што всушност ќе значи и поддршка на пораката на младите актери, а тоа е дека сите луѓе се еднакви“, изјави директорот на културниот центар, Луан Зенки.

Билјана Беловинова како претставник на групата граѓани кои се приклучија во акцијата, ги повика гостиварци во петок да дојдат во што поголем број. „Упатуваме апел до сите гостиварци да ја поддржат иницијативата, затоа што е од хуманитарен карактер и сите собрани средства ќе се донираат во хуманитарни цели. Ова е убав момент да покажеме добра волја и солидарност и да помогнеме кадешто е потребно“, рече таа.

Билетите за претставата нема да имаат фиксна цена, туку граѓаните ќе ги плаќаат според своите можности и желба. Освен на влезот пред самата изведба, билети ќе се продаваат во текот на утрешниот ден на градскиот плоштад и некои пофреквентни улици низ Гостивар. Почетокот е закажан за во 18 часот.