„Убавината не познава граници“ – бура од емоции на модната ревија на деца со посебни потреби во Гостивар

„Убавината не познава граници“ – под ова мото вчеравечер во Центарот за култура во Гостивар, се одржа модна ревија на деца со посебни потреби. Дечињата носеа модели изработени од рециклирани материјали, а на сцената беа придружувани од спортисти, музичари, писатели… Вечерта донесе бура од емоции, насмеани и задоволни лица и успешно завршена мисија: да се испрати порака за еднаквост.

Настанот го организираше Здружението на лица со посебни потреби „Заедно можеме“, со поддршка на гостиварскиот Црвен Крст и општината.

„Сакаме да им дадеме можност на овие дечиња да ги покажат своите уметнички способности и да испратиме порака дека и тие се еднакви како сите деца. Тоа што носат облека од рециклирани материјали е во духот на зачувување на животната средина“, рече Илир Адеми, дел од тимот за организација.

Во публиката, освен семејствата, пријателите, роднините, имаше и личности од јавниот и политичкиот живот.

Манифестацијата беше збогатена и со музички настап на повеќе млади таленти од Гостивар, како и на малите танчери од IDance Studio.

Дедо Мраз ги израдува децата кои беа дел од модната ревија со пакетчиња, додека организаторите доделија благодарници за соработниците и поддржувачите.