Уште едно лице заразено со морбили во Гостивар

Бројот на заболени од мали сипаници во земјава континуирано расте. Според податоците од Институтот за јавно здравје, во периодот од 30 март до 5 април, пријавени се вкупно 71 случај, од кои 35 се од Скопје.

Што се однесува до гостиварското подрачје, регистриран е еден нов случај, а лицето спаѓа во  возрасната група од 20 до 29 години, и примило само една доза вакцина, односно е непотполно вакцинирано. Со новиот случај, бројката на заболени од мали сипаници во Гостивар достигна шеснаесет.

Активни епидемии на мали сипаници во моментот има во шест здравствени региони – Скопје, Тетово, Куманово, Гевгелија, Кичево и Струга.

Mорбилите се акутно вирусно, многу заразно заболување, кое се манифестира со карактеристичен осип, висока температура и респираторни симптоми и знаци. Инкубацијата таре од 10 до 12 дена, по што се јавува зголемена телесна температура од 38 до 40 степени, главоболка, малаксаност, вознемиреност, солзење на очите, течење на носот, сува кашлица. Потоа, следна фаза е појава на бели наслаги во устата, што се задржуваат два до три дена, а по еден до два дена се јавува осип на кожата со телесна температура од 38 до 40 степени.