Вечерва нема полициски час, кафеаните може да работат до 23.30 часот

Согласно одлуката на Владата вечерва 12-ти спроти 13-ти мај нема ограничување на движењето на граѓаните, поради муслиманскиот празник Рамазан Бајрам. Полициски час немаше и за христијанскиот празник Велигден.

Од утре ограничувањето се враќа на сила, но во скратена форма и ќе важи од полноќ до 4 часот наутро. Почнувајќи од денес (среда) до 18 мај (вторник), угостителските објекти може да работат максимум до 23:30 часот, а за време на дозволеното работно време се дозволува работа само на отворените делови – тераси  од угостителскиот објект.

Исклучок од ова ограничување се угостителските објекти на Меѓународниот Аеродром Скопје и Аеродромот „Св.Апостол Павле“ во Охрид, како и угостителскиот објект/дел за исхрана во угостителските објекти за сместување (хотел, мотел, хостел, пансион и друг објект за сместување) за посета од лицата сместени во овие објекти.

Исто така од денес престанува да важи мерка за забраната за посетители – гости во сите вежбални, фитнес клубови, спортски центри и сали наменети за вежбање, во затворен простор, како и во игротеките, но работата во овие објекти задолжително треба да се одвива според протоколите за работа.