Вирусите косат-На детското одделение во Гостивар дневно по 50 пациенти

Најмалите на удар на вирозите и грипот. Во изминатите денови зголемен е бројот на пациенти на детското одделение во гостиварската општа болница. Во текот на денот лекарска помош од педијатар за своите дечиња бараат 40 до 50 родители.

Најчесто се работи за респираторни инфекции на горните дишни патишта предизвикани од вируси. Лекарите велат дека невообичаено топлите темпаратури за овој период од годината се погодни за нивно ширење, а како фактор го споменуваат и загадувањето на воздухот.

„Температурите достигнуваат до 15 степени, што е многу невообичаено за овој период, а исто така и загадувањето на воздухот е енормно. Погодени се сите деца, но најмногу најмалите затоа што се` уште немаат доволно формиран имунитет и тие се подложни многу побрзо да се разболуваат. Првите симптоми се температура, суво кашлање, одбивање да цица или јаде, кај некои деца се јавуваат болки и вознемиреност, а кај некои и дијареа, повраќање, па може да дојде и до дехидрација. Вирусните заболувања траат 5 до 7 дена кај децата кои имаат добар имунитет и поминуваат без последици.“, вели педијатарот д-р Ферит Муча, раководител на детското одделение.

Иако поголемиот дел од децата ги поминуваат вирусите со вообичаена клиничка слика,  има и случаи кога пациентите развиваат бронхит или пнеумонија. На детското одделение во Гостивар деновиве имало и дечиња со такви компликации.

Педијатарот Муча вели дека првично родителите треба да ги ублажуваат симптомите со парацетамол, туширњае со млака вода, давање на што повеќе течности како чаеви, овошни сокови, зеленчук и овошје.

„Ако детето повеќе од 3 или 5 дена има висока температура над 39 степени, отежнато дишење, свиркање на градите, тоа е знак дека се зафатени и долните дишни патишта и тогаш родителите мора да побараат помош од педијатар. Ние на нашето одделение имаме неколку деца со компликации, меѓутоа сите се во стабилна состојба.“, нагласи д-р Муча.

Како совети за превенција лекарите ги даваат: избегнување на затворени простории, често проветрување, престојување на отворено секој ден и зголемен внес на витамини и минерали.