Владиката г.Јосиф на литургија во „Св. Петка“ во Гостивар во чест на денешниот празник

Утрово на православниот празник посветен на Света Параскева Римјанка, беше отслужена архиерејска Литургија во црквата „Св. Петка“ во Гостивар на која чиноначалствуваше Митрополитот Тетовско-гостиварски г.Јосиф во сослужение на протоереј-ставрофор Марианчо Мадевски, ереј Мартин Андоновски и ѓакон Славче Ѓоргески.

По завршувањето на Литургијата, беше извршен чинот на Мал водосвет и беше прекршен празничниот колач.

Митрополитот г.Јосиф се обрати кон присутните верници со пригодна беседа на која меѓу другото нагласи:

„Ние денес ја прославуваме света Петка Римјанка. Оваа света душа живеела во II век во Рим и била испросена со силните молитви на нејзините родители и како таква уште од најмлади години била упатена во верата Христова. Уште како мало девојче се одликувала со скромност и побожност, живеејќи вистински христијански живот. Како млада личност ги собирала луѓето околу себе и Го проповедала Господа Христа распнатиот и воскреснатиот. Но по смртта на нејзините родители таа го поделила имотот на сиромашните и се замонашила во Рим. Тогаш многу посмело и похрабро почнала да го проповеда учењето Христово. Не треба да заборавиме дека во II век по Христа, Римската империја била главен гонител на христијанството, а оваа пак, Параскева, го проповедала забранетото учење токму во центарот на империјата. Заради нејзината проповед била изведувана пред судови и осудувана, подвргнувана на разни мачења и страдања. Но, заради цврстината во љубовта кон науката Христова, кај неа во ниту еден момент верата не се намалила и не згаснала. Токму преку подвизите и мачењата, оваа светителка се издигнувала пред Бога, а Бог, пак, и давал сила и благодат за да може храбро да ги поднесе сите страдања и маченички за Господа Христа да го заврши нејзиниот живот.Пораката од Житието на Света Параскева, дека секој од нас треба да биде исповедник и маченик за Христовата вера. На грчки јазик за маченик се вели μάρτυρ, што во буквален превод значи сведок. Смислата е дека Христијанинот е призван секогаш да ја сведочи светлината Христова, која го просветува и осветува овој свет, според зборовите Негови: Јас сум Светлината на светот. Нашата света вера се нарекува ортодоксна, православна, правоверна, па оттаму секој Христијанин е должен правилно да живее, подобно на Светата Преподобномаченица Параскева и на безбројните маченици, знајни и незнајни.Сите ние кои се наоѓаме денес во овој храм во Гостивар посветен во нејзина чест, да се обратиме со искрена молитва кон света Петка, да ни даде и ние да поднесеме еден дел од нејзините подвизи, па и ние да имаме храброст и цврстина да Го исповедаме на секое место и во секое време Господа Христа.“

фото: тетовско-гостиварска епархија