Во Гостивар денес гласаат 26 заболени со ковид и лица со решенија за изолација

Денес, според правилата за Парламентарните избори 2020, гласаат заболени од ковид и лица со решенија за изолација, кои се пријавиле да го остварат правото на глас до 8 јули.

Според информациите од Општинската изборна комисија, во Гостивар вкупно се пријавиле 31, од кои 26 ги исполнувале условите и им е одобрено гласањето. Изборниот процес кај нив го спроведуваат посебни одбори, составени од здравствени работници, под засилени мерки на заштита од коронавирус.

„Овие одбори ги формираше Државната изборна комисија, за разлика од другите кои ги формираме ние, како општинска комисија. Утрово се направи примопредавањето на материјалот кај посебните одбори и тие се на терен да го спроведат гласањето кај граѓаните во домашна изолација. Процедурата на гласање е иста, како и кај болните и немоќни кога гласаат во домашни услови, со тоа што поради коронавирусот се преземаат максимални мерки за заштита“, рече Мустафа Муслиу, претседател на ОИК Гостивар.

Утре, на вториот ден од гласањето правото на глас го остваруваат болни и немоќни, како и лица во домашен притвор. Од 213 поднесени барања, комисијата во Гостивар одобрила 198 за болни и немоќни како и 4 лица во домашен притвор.