Во Гостивар до сега за гласање пријавени 18 болни и немоќни, ниту еден со ковид или во изолација

Болните од ковид-19 и лицата во изолација за да го остварат правото на глас на Парламентарните избори треба да се пријават во Општинските изборни комисии, преку полномошник, најдоцна до среда (8 јули) на полноќ. Дотогаш е рокот за пријавување и на другите болни и немоќни лица, кои сакаат да гласаат во своите домови. Тие до ОИК треба да достават соодветна медицинска документација со која ќе го поткрепат барањето.

До Општинската изборна комисија на Гостивар до сега пристигнале 18 пријави за гласање на болни и изнемоштени лица. Се уште нема ниту една пријава за гласање на пациент со ковид или за лице во изолација.

Гласањето на болните од ковид и оние во изолација ќе се спроведе на 13 јули (понеделник), додека наредниот ден на 14 јули (вторник) ќе гласаат болните, немоќните, хронично болните и лицата во затворите и во домашен притвор.

Главниот ден на гласање на изборите е 15 јули, кога гласачките места ќе бидат отворени во 7 часот наутро се до 21 часот. Предвидено е изборниот процес да се одвива согласно задолжителните препораки и упатства усвоени од Државната изборна комисија.