Во Гостивар приведени 4, во Тетово 2 лица заради прекршување полициски час

Секторот за внатрешни работи Тетово регистрира шест прекршувања на забраната за движење на полошкото подрачје. Во Гостивар 4 лица не го почитувале полицискиот час,  додека во Тетово две. Меѓу нив немало малолетници, ниту граѓани постари од 67 години, за кои категории важат и дополнителни ограничувања. Лицата биле лишени од слобода и задржани во Полициска станица, а против нив ќе биде поднесена соодветна кривична пријава.

Како што информира портпаролот на СВР Тетово, Марјан Јосифоски полициските службеници извршиле контрола на сите лица во регионот со потпишана изјава за самоизолација и со решение за изолација и кај нив не е евидентирано ниту едно прекршување.

Во Тетово со решение за изолација од Државен санитарен и здравствен инспекторат има 328 граѓани, а во Гостивар 28. Изјава за домашна самоизолација во Тетово имаат потпишано 195 лица, додека во Гостивар 72.

Во државен карантин во еден објект во тетовско се сместени 62 лица, а во два објекти во гостиварско вкупно 133.