И во Гостивар се собираат потписи за подолго породилно

Граѓанската иницијатива за законски измени со кои ќе се продолжи породилното отсуство на мајките, бара поддршка и од граѓаните на Гостивар. Со давање потпис се поддржува барањето – родилките наместо девет, да можат да останат 18 месеци дома со своето бебе. Во Гостивар потписите се собираат во подрачната канцеларија на Министерството за правда. Оние кои сакаат да се потпишат, со себе треба да носат лична карта.

За да влезат предлог измените во собраниска процедура потребно е да се соберат 10.000 потписи. Собирањето потписи се спроведува низ целата земја и ќе трае до 7 октомври.

Граѓанските здруженија иницијатори на петицијата, сметаат дека девет месеци е премалку време за породилно на мајките, тие немаат каде да ги остават своите бебиња и дека мора да тргнат на работа токму кога им се најмногу потребни на своите најмили.

-Осумнаесет месеци е најиделно за детето, тогаш тоа е доволно психички созреано и може да се оддели од мајката, сметаат активистките.