Во Гостивар секојдневно расте бројката на заразени од грип – во земјава доминира свинскиот грип

Грипот зема замав на гостиварското подрачје. Според последните податоци од Институтот за јавно здравје, пријавени се околу 600 граѓани со симптоми на грип. Во јануари неделно просечно заболуваа по 200 лица, а лекарите очекуваат активноста на вирусот да биде поголема овој месец. Тетово по број на заболени е веднаш после Гостивар со околу 360 случаи.

Извршените лабараториски анализи врз примероци земени од заболени пациенти, покажале дека во земјава доминира вирусот Х1Н1, познат како свински грип. Овој тип на грип започнува да се манифестира многу нагло, со висока температура, јаки болки во мускулите, зглобовите, главоболка, малаксаност. Потоа се јавуваат и проблеми со  респираторниот систем: засипнатост, кашлица, болки во грлото, а може да дојде и до воспалување на очите. Болеста обично трае од 5 до 7 дена.

Периодов во амбулантите низ Гостивар има и зголемен број на пациенти со настинки, вирози и инфекции на горните дишни патишта кои не предизвикани од грип. Во Диспанзерот за градни болести во гостиварската болница во јануари медицинска помош побарале над 400 лица.