Во земјава до сега над 10.000 дијагностицирани со корона, во регион на Гостивар 372

Со последната објавена статистика на Министерството за здравство за состојбата со ковид вчера, бројката на дијагностицирани случаи од почетокот на пандемијата достигна 10.086. Од нив, како веќе оздравени пациенти со по два негативни контролни теста се водат 5.427, додека активни случаи моментално се 4.199. Во евиденцијата за коронавирус на надлежните служби запишани се 460 починати граѓани кај кои бил потврдена инфицираност.

Во гостиварскиот регион, што ги опфаќа општините Гостивар, Врапчиште и Маврово Ростуше, вкупно до сега биле дијагностицирани 372 заразени со корона. 126 се оздравени,  223 се активно болни, а 23 завршиле со смртни последици.

Бројот на нови случаи на гостиварското подрачје започна значително да расте од почетокот на месецов, од кога секојдневно се бележат новозаболни. Така сега, Гостивар е меѓу првите пет региони во Македонија по бројот на активно болни, заедно со Скопје, Куманово, Штип и Тетово.