Волонтери на гостиварскиот Црвен крст нудат помош на стари и изнемоштени како и на лица во самоизолација

Општинската организација на Црвениот крст Гостивар информира дека сите стари изнемоштени лица, лица со посебни потреби, неподвижни лица, лица со инвалидитет и лица кои се во самоизолација од Општина Гостивар, Маврово – Ростуше и Врапчиште може да им се обратат за помош за набавка на храна, лична хигиена и лекови. Трошокот за набавката ќе биде на товар на самите граѓани, а волонтерите ќе ја извршат набавката и доставата до нивните домови.

„Набавката ќе се врши секој работен ден од 8:30 до 12:30 часот а дистрибуцијата ќе биде само еден ден од неделата (петок), пријавувањето ќе биде на телефонските број 042 /216 488 или на е-маил адресата: gostivar@redcross.org.mk. Доставата ќе биде од страна на легитимни волонтери на ООЦК Гостивар при што при доставата ќе треба да ја покажат својата легитимација, а корисникот ќе треба да пополни изјава за вредноста на паричните средства. Секој што сака да биде дел од тимовите мора да се пријави во Општинската организација на Црвен крст Гостивар и да стане легитимен волонтер“, велат од Црвен крст ОО Гостивар.