Воспитувачка од градинка во Гостивар позитивна на корона, 10 деца и колешката се во изолација

Регистриран е прв случај на коронавирус во детските градинки во Гостивар. Се работи за воспитувачка, која резултатите од тестирањето ги добила вчера (20 октомври), а на работа последен пат била во петокот.

Според протоколот, сите 10 деца во групата што ја води на возраст од 2 до 3 години, како и  колешката негувателка се ставени во домашна изолација.

„Воспитувачката пројавила симптоми во неделата, кога била дома, а последен пат на работа беше во петокот. Со оглед дека работи во градинка во понеделникот веднаш и бил направен тест и резултатот го доби вчера, за жал позитивен. Состојбата и е добра, со полесни симптоми, само еден ден до сега качила температура. Се тестирале и членовите на нејзиното семејство и тие се негативни. Ги известивме надлежните во Центарот за јавно здравје во Гостивар и тие дадоа препораки да ги информираме родителите на децата кои се во групата на воспитувачката, како и негувателката со која работат заедно, да не доаѓаат во градинка и да бидат во домашна изолација.“, објасни Мирјана Мицоска, директор на детските градинки во Гостивар.

Ниту едно од децата и негувателката кои се во изолација до сега не пројавиле симптоми на ковид. Од повторното отворање на 9 септември, градинките функционираат под посебни протоколи, кои строго се почитуваат. Во занималната на групата со заболената воспитувачка ќе се спроведе и вонредна дезинфекција.

„Протоколот строго се следи. Редовно се врши дезинфекција, вработените постојано носат маски, многу се внимателни при активностите, исхраната, спиењето на децата, се‘ да биде според пропишаните правила. Воспитувачката се‘ уште не е сигурна како точно се заразила, затоа што немала директен контакт со потврден случај, но сигурно не е од градинка затоа што сите си ги почитуваат протоколите и во тој поглед сме навистина ригорозни“, нагласи Мицоска.

Моментално во градинките во Гостивар престојуваат 250 деца, а бројката секојдневно расте. Меѓу дечињата до сега не се појавил сомнителен случај на коронавирус.