За две недели над 210 граѓани во Гостивар казнети за неносење маски

Носењето на заштитна опрема која ги покрива носот и устата е задолжително од крајот на април, но очигледно е дека повеќето граѓани тешко се привикнуваат на ова правило и не го почитуваат доследно. Во Гостивар може да се забележи дека и во гужви и во затворени простории, не се носат маски, иако нема услови за да се одржува растојание. Дел од граѓаните пак, маските ги носат под брадата или со нив им е покриена само устата.

Според податоците од Секторот за внатрешни работи на гостиварското подрачје, во првите две недели од месецов, 217 граѓани добиле казнени налози затоа што не ја почитувале одредбата за задолжително носење на заштитна опрема. Најголемата бројка на казни изречени во еден ден била 46. Неносењето маска лицата кои биле фатени ќе ги чини 20 евра.

Заштитна опрема е задолжителна во сите затворени јавни објекти како државни институции, маркети, продавници, банки, пошти, јавен превоз, чекални, здравствени институции и слично, како и на отворени пазари и секогаш кога не може да се одржи дистанца од 2 метри.

Маска надвор не е задолжително ако се престојува во двор на станбена семејна куќа, се вози велосипед или се спортува на отворено, но се одржува дистанцата од минимум 2 метра, се патува во патничко моторно возило со лица со кои заедно живеете, се движите на јавни места и површини од отворен тип каде не слободно може да одржувате дистанца од 2 метри.