За три дена 78 лица во Гостивар ставени во изолација

Ширењето на коронавирусот на гостиварското подрачје, секојдневно го зголемува и бројот на граѓани кои одат во задолжителна домашна изолација.

Изминатите три дена на вкупно 78 лица им биле издадени решенија за изолација, од страна на Државниот санитарен и здравствен инспекторат. Решенијата се за период од две недели, во кој лицата не смеат да ги напуштаат своите домови.

Според статистиката на Секторот за внатрешни работи Тетово, во изминатото деноноќие полицијата исконтролирала вкупно 306 граѓани во изолација и констатирала дека сите ја почитувале мерката, односно дека немало прекршувања.

Што се однесува до задолжителното носење маски, во текот на изминатото деноноќие, во Гостивар затекнати биле 27 граѓани кои не ја почитувале оваа мерка. За нив се изготвени прекршочни платни налози, согласно член 6 од соодветната владина Уредба. Казната изнесува 20 евра.