За зимница направете си ваков специјалитет, ајвар со шампињони

Септември е месецот за подготовка на зимници. Сите добро го знаеме вкусот на традиционалниот ајвар, но оваа година ви предлагаме да пробате и нешто ново, а тоа е ајвар со шампињони. Овој рецепт за ајвар се состои од стандардната комбинација на модар домат и црвени пиперки со додаток на шампињони, се тоа спакувано во тегла за супер појадок за во зима, со извонреден вкус.

Потребни состојки за ајвар со шампињони:

• 5 килограми модар домат
• 10 килограми црвени пиперки за ајвар
• 2,5 килограми шампињони
• 1,5 литар доматен сос
• 1 литро масло
• 3 чешниња лук
• 1 шака сол
• 1 лажица бибер
• Ловоров лист по желба
• 1 винобран

Подготовка:

Пиперките за ајвар и модриот домат се печат. За полесно да се олупат, оставете ги во сад со капак, половина час. За тоа време, печурките се сечат на мали парчиња и се ставаат да се динстаат. Кога ќе бидат половина готови може да ги тргнете од огнот. Пиперките и модриот домат се лупат и се чистат од семки, а потоа се мелат.

Шампињоните се мешаат со измелените пиперки и домати, се додава лукот исечкан на мали парчиња, се додаваат маслото, биберот, доматниот сос, солта и ловоровиот лист и се варат на тивок оган. Исто така цело време ја мешате смесата за да не загори.

Ајварот е готов кога сите состојки се соединиле, а маслото испливало на површина. На крајот се додава винобран и се меша повторно.

Ајварот се става топол во веќе загреани тегли. Се оставаат малку време во загреана рерна, а потоа  убаво се затвораат и се чуваат на ладно место.