Заборавете на автомобилите – возете велосипед!

 Додека во некои земји, велосипедите стануваат основно средство за превоз, кај нас генерално се користат за рекреација. Во наши услови, многу ретко се среќаваат луѓе кои секојдневно на работа се превезуваат со велосипед. Не развиваме такви навики за жал, ниту кај помладата генерација. Сепак, за поздравување е што велосипедите не се целосно заборавени, туку се користат во слободното време за рекреација.

А причини да возите велосипед има многу. Возењето велосипед позитивно делува врз здравјето, се зајакнуваат мускулите, зглобовите стануваат поподвижни, а се подобрува и држењето на телото. Ако сте од оние кои патат од вишок на килограми, тоа е вистинската активност за вас. Исто така, докажано е дека возењето велосипед го подобрува функционирањето на кардиоваскуларниот систем, го чува менталното здравје и го намалува стресот.

Освен добро за здравјето, ќе си направите добро и за џебот, односно ќе заштедите пари, ако автомобилот го замените за велосипед. Периодов тоа нема да ви биде тешко, затоа што следуваат топли и пријатни денови. Плус ќе ги избегнете гужвите и метежот низ улиците.

Уште една причина е зачувувањето на околината. Сите знаеме колку автомобилите го загадуваат возхудот, истиот тој воздух што потоа го дишеме. Од велосипедот, нема такви еколошки штети.

Некои навики вреди да се сменат. Пролетта е идеално време да го извадите велосипедот од подрумот и да се натерате да го користите што повеќе.