Заев ги повика гостиварци да го поддржат Бејта во вториот круг

Претседателот на СДСМ, Зоран Заев, вечерва од градскиот плоштад во Гостивар ги повика граѓаните во вториот круг од Локалните избори, да гласаат за кандидатот за градоначалник на ДУИ, Невзат Бејта.

„Со вашето присуство вечерва овде покажувате и пред мене но и пред цела Македонија дека имаме нешто заедничко, а тоа е Македонија, тоа е љубовта кон Гостивар и нашата заедничка желба за живот еднаков за сите. Единствениот концепт што има иднина ни е заедништвото, здруженоста, сплотеноста и само така може да оди Гостивар напред, да оди Македонија напред. Доста ни беа поделби и делби. Гостивар отсекогаш бил пример за соживот, мултиетничност и сплотеност, концептот е јасен. Јас сум тука дојден вечерва да побарам поддршка за Гостивар предводен од Невзат Бејта. Невзат е мој другар, поминавме многу премрежија заедно. Во 2005 година, со почетокот на децентрализацијата почна натпреварот меѓу општините, моја Струмица важеше за една од најуспешите, но два пати претпре пораз од Невзат Бејта и од Гостивар. Јас знам колку тој го сака Гостивар и дека со мала поддршка од централната власт, Гостивар ќе блеска и сметајте на целосна моја поддршка во периодот што следи“, изјави Заев кој се осврна и на кандидатурата на министерот за здравство и противкандидат на Бејта, Арбен Таравари од Алијансата за Албанците. „Од другата страна имаме кандидат кој е министер во мојата Влада. Предлагам да продолжиме вака – секој да си ја гледа својата работа. Јас премиерската, докторот да го гледа здравството, а Невзат да си ја гледа општината. Никој не ја познава општината подобро од него“, нагласи лидерот на СДСМ.

Бејта во своето обраќање се заблагодари на Заев за посетата и поддршката.  „Ние го направивме Гостивар убав град и ќе направиме градот да ни биде уште поубав, но не можеме да ги реализираме проектите без поддршката од нашиот премиер. Најголема чест ни е што дојде вечерва во Гостивар“, рече Бејта.