Здружението „Д-р Трајче Нешковски“ и Општина Гостивар заедно за поддршка на децата со попреченост

Општина Гостивар и Хуманитарното здружение на граѓани „Д-р Трајче Нешковски“ потпишаа меморандум за соработка со заедничка цел подобрување на условите за децата со попреченост. Со документот, двете страни се обврзаа на подигнување на свеста и обезбедување на поддршка за интеграција на овие деца во образованието и општеството во средни училишта на територијата на општината.

„Приоритетна цел на оваа соработка е осигурување на образовни и лични асистенти за децата со попреченост во средните училишта. Ова ќе се оствари преку мапирање на бројот на деца кои имаат потреба од оваа поддршка и објава на јавен повик за ангажирање на асистенти за тековната учебна година 2023/2024. Оваа иницијатива цели и да ја засили социјалната кохезија, прифаќањето на различностите и инклузијата на сите деца и лица со попреченост во општеството. Целта е не само подобрување на условите за учење на децата, туку и нивното прифаќање од страна на заедницата, соучениците и професорите.“, информираа од Здружението.

Активностите, меѓу другото предвидуваат: панел дискусија со експерти за развивање на свеста на родителите/ старателите на деца со попреченост за важноста тие да ги пријават до надлежните институции (училиштата) своите деца дека имаат потреба од образовен и личен асистент, давање континуирана поддршка на родителите/старателите на деца со попреченост, но и на самите деца во процесот на нивна инклузија во општеството, распишување на јавен повик до родителите/старателите на деца со попреченост, во училиштата да пријават дека имаат дете со попреченост на кое му треба образовен и личен асистент, заради подобра интеграција во образовниот процес, распишување јавен оглас за ангажирање на образовни и лични асистенти за децата- ученици во средните училишта, во период за учебната 2023/2024 година.

Јавниот повик до родителите/старателите на деца со попреченост и јавениот оглас за ангажирање на образовни и лични асистенти за децата- ученици во средните училишта ќе се објави во средината на декември, проектот е предвидено да стартува со почеток на второто полугодие од учебната 2023/2024 година..