Гимназијалците со силни новогодишни пораки и хуманитарна акција

Во пресрет на новогодишните празнувања, група ученици од гостиварската гимназија заедно со свои професори реализираа креативна мултиетничка работилница. Изработија елка на која ги истакнаа своите пораки и желби: Во новата 2018 посакуваме новогодишно пакетче за секое дете, Да нема предрасуди кои водат до конфликти, Да не бидеме игнорирани и да имаме активно учество во донесувањето одлуки, Посакуваме никој да не се смее на вицови со дискриминација, Да се сакаме, почитуваме , да се дружиме и да се помагаме и други.

Учениците напишаа и пораки до надлежните институции во градот:  Гостивар да добие мерна станица за мерење на квалитетот на воздухот, стандардизирана депонија, градска читална, велосипедски патеки…

Дел од работилницата беше и продажба на новогодишни честитки низ градот од што собраните средства ќе се наменат за социјално загрозени семејства.

Работилицата се одржа во рамки на проектот Мировно образование кој во гимназијата се спроведува во соработка со првата детска амбасада на светот Меѓаши.  Во активностите учествуваа кординаторот на проектот Валентина Штерјовска, професорите Светлана Јовановска, Билјана Штерјовска, Кристина Крушорацки, Миле Апостолоски и Реџо Чако како и петнаесетина ученици од македонски, албански и турски наставен јазик.