Учениците и навивачите во Гостивар посмирени – Намален бројот на инциденти

Анализите на полицијата покажуваат дека во основните и средни училишта во Гостивар се намалува бројот на нереди, тепачки и напади. Минатата година ги имало вкупно осум, што споредено со претходните години е помалку, а според надлежните и последиците биле од полесен карактер.

Од Секторот за внатрешни работи Тетово нагласуваат дека јавниот ред и мир во и околу образовните установи останува еден од нивните главни приоритети

„Полициски патроли беа присутни околу основните и средните училишта, особено за време на големите одмори и смените на учениците, а таквата практика продолжува и годинава. Покрај тоа, во училиштата се реализираа и десетина превентивно-едукативни проекти, чиј носител беше Отсекот за превенција, во рамките на кои учениците поблиску беа запознати со негативните последици и законските импликации, кога станува збор за прекршоци од областа на јавниот ред и мир, користење наркотични дроги, говор на омраза и друго“, наведуваат од СВР.

Минатата година, значително биле намалени и нарушувањата на спортски натпревари. Во Тетово и Гостивар се регистрирани по два случаи, за разлика од претходната година кога ги имало вкупно 11.