Нова полициска контрола, 37 казни за возачи во Гостивар

Секторот за внатрешни работи Тетово вчера (5 октомври) од 14 до 19 часот спроведе акциска контрола за престигнување, а во која се откриени и санкционирани вкупно 47 прекршоци (Тетово-10 и Гостивар-37).

„На сите прекршители изготвени им се поднесоци и тие ќе се соочат со парични глоби кои за овој вид сообраќаен прекршок се движат од 45 до 250 евра во денарска противвредност. Покрај ова, за оние кои престигнувале на „полна линија“ или во колона на непрегледни места предвидена е и заштитна мерка-времено одземање на возачката дозвола од три месеци до една година. Вакви и слични контролни активности планирани се и во наредниот период, дотолку повеќе што непрописното престигнување и годинава е една од неколкуте најчести причини за сообраќајни несреќи на полошкото подрачје, покрај неприлагодената брзина, управување под дејство на алкохол, неправилно вршење дејствие и друго.“, информира СВР.

Вчера, исто така, на тетовското подрачје биле санкционирани и 6 возачи кои управувале без положен возачки испит и валидна дозвола, како и 13 непрописно, односно погрешно паркирани возила. Откривањето и санкционирањето на овие два видови сообраќајни прекршоци планирано е и во деновите што претстојат, со напомена дека за девет месеци годинава биле санкционирани 1306 возачи кои непоседувале возачки дозволи, а вкупно 2792 непрописно паркирани возила биле подигнати од тетовската „пајак-служба“.