Во Тетово фатени албански државјани со две вреќи марихуана

Две лица од градот Кукс, Албанија вчера попладне во Тетово биле фатени со црни најлонски вреќи во кои имало марихуана. Од Секторот за внатрешни работи  известуваат дека лицата на возраст од 24 и 34 години, биле лишени од слобода околу 16 часот и 20 минути во Тетово.

„Албанските државјани со себе носеле по една црна најлонска вреќа со непозната тревлива материја, најверојатно марихуана и штом ги забележале полициските службеници, веднаш ги фрлиле вреќите и почнале да бегаат. Едниот од нив, меѓутоа брзо бил фатен, додека вториот продолжил со бегање, се оглушил на наредбите на полициските службеници, поради што бил испукан еден предупредувачки куршум во воздух. За кусо време и тој  бил стигнат на улица „108“, пружил активен отпор, но ефикасно е совладан и внесен во службеното полициско возило“, стои во соопштението.

Двете вреќи во кои имало вкупно околу 3 и пол килограми тревлива материја се фотодокументирани и одземени за вештачење.

Лицата се задржани во Полициската станица Тетово и во координација со јавен обвинител, во текот на денот ќе бидат изведени пред судија во Основниот суд во Тетово.