Во тек е конкурс за есеј по повод Денот на ослободувањето на Гостивар

Основците и средношколците од гостиварските училишта кои имаат желба и талент за пишување, може да учествуваат на конкурсот распишан по повод 18-ти Ноември, Денот на ослободувањето на градот. Традиционално Општинскиот одбор на сојузот на борци, како организатор на одбележувањето претходно отвора конкурс за најдобар есеј. Годинава учениците пишуваат на тема: „Слободата е нашата сегашност и патоказ за посветла и посреќна иднина на сите нас“ . Должината на текстот треба да биде од 400 до 500 карактери.

„Веќе ги известивме сите основни и средни училишта за конкурсот и очекуваме како и секоја година, да има голем интерес од страна на учениците и менторите. Делата ќе ги оценува посебна комисија и најдобрите ќе бидат наградени на самата манифестација по повод 18-ти ноември“, велат од гостиварската боречка организација.

Конкурсот трае до 13 ноември, понеделник, а учениците есеите ги доставуваат до училиштата. Манифестацијата за Денот на ослободувањето на градот ќе се одржи следниот петок.