Демант од општината: Решението со кое се оспорува изборот на претседател на Советот е законско

Од општина Гостивар преку соопштение испратија демант на реакциите од денешната прес конференција на Насир Муслиу на која тој посочи дека незаконски се оспорува изборот на претседател на Советот. Наведуваат дека градоначалникот има право да донесе решение за запирање на објавување на Одлуката за избор на претседател на Советот на општината во Службен билтен.

„Градоначалникот на општина Гостивар, врз основа на член 50 став 1 точка 2 а во врска со член 51 став 1, 2, 3 и 4 од Законот за локалната самоуправа (“Службен весник на Република Македонија“ бр. 5/2002), донесе Решение за запирање на објавувањето на Одлуката за избор на Претседател на Советот на Општина Гостивар во Службениот билтен, бидејќи не е донесен во согласност со Законот за локалната самоуправа, Статутот на општината, како и Деловникот на Советот на општина Гостивар. На Конститутивната седница на Советот, предлогот е даден од страна на Комисијата за верификација, мандатни прашања, избори и именувања, која Комисија, според Деловникот на Советот на општина Гостивар, не е надлежна за предлагање на кандидат за претседател на Советот на Општината“, стои во демантот.

Од општината соопштија дека градоначалникот Таравари најавил формирање на ново мнозинство во Советот.