Светот го одбележува Меѓународниот ден на мајчиниот јазик

Дваесет и први февруари е Меѓународен ден на мајчиниот јазик. Прогласен е од УНЕСКО во 1999 година во насока на промовирање на важноста од сочувување и негување на мајчиниот јазик, но и на важноста на јазичната разновидност.

Денес на земјината топка се говори на повеќе од 6000 јазици, но на половината од нив во разни делови на светот им се заканува исчезнување. Статистиката покажува дека во последните три века има значително изумирање и намалување на бројот на таканаречните мали јазици. Ова особено ги погодува одредени земји во Америка и Австралија.

Покрај Меѓународниот ден на мајчиниот јазик, на 26 септември се одбележува и Денот на европските јазици. Во 1998 година стапи во сила Европската повелба за заштита на регионалните и малцинските јазици со која, исто така, се потенцира лингвистичката разновидност и повеќејазичноста.
Мајчиниот јазик како културно и духовно наследство е исклучително значаен за идентитетот на секој народ.