Чувар на срцето полн со витамини – Каде има квалитетен костен во гостиварско?

Моќните плодови на питомите костени се природен извор на енергија и здравје, посебно во студените зимски денови.  Од костените „извира“ витаминот Ц, што е еднакво концентриран колку и во лимоните, само што костените се попријатни за јадење. Во Гостивар најквалитетни костени има во регионот на селата Печково и во Речане. Костените од тој крај се барани на пазарот, не само во Гостивар, туку и пошироко. За да се нарече квалитетен, еден костен треба да ги исполува двата главни услови: да биде благ и крупен.

Зошто треба да јадеме костени?

Костенот има ниско ниво на калории и масти, а е богат со минерали, витамини и фитонутриенти (чудотворен антиоксиданс). Со самото тоа што костените се богати со витаминот Ц, ги прави одличен избор за закрепнување на имунитетот.
Калциумот и фосфорот во костените помагаат за закрепнување на нервниот систем, ги зајакнуваат коските и ја подобруваат работата на срцето. Костените содржат и високо ниво на протеин, големо количество на манган и калиум.

Кој е најдобриот начин за подготвување на костени?

Пред да почнеме со подготовка, секако треба да знаеме да ги класираме односно да знаеме да одбереме тазе костени. Доколку костенот е мек и гнил, неговата лушпа не е цврста, тогаш сигурно е стар. Младиот костен е карактеристичен по својата светло кафеава боја и тврда структура.
На костените им треба подолго време да се варат, за да омекнат. Освен варените, исто така се убави и печените костени. Сеедно, како е подготвен костенот не ги губи своите хранливи материи.