Спортската сала во Гостивар без струја – општината посочува прст кон мнозинството во Советот

Спортската сала Младост во Гостивар е исклучена од електрично напојување поради неплатени сметки. Општина Гостивар вината ја насочија кон мнозинството во Советот кое на седницата во понеделник гласаше против доделување на субвенции на ЈП “Ринија“.

„Во ова претпријатие во чии што рамки функционира спортската сала каде што спортските активности ги вршат спортските клубови од Гостивар и околината, претходното општинско раководство создаде огромни неподмирени обврски кон ЕВН, за потрошена електрична енергија. И покрај тоа што самите се одговорни за  создадената ситуација во ЈП “Риниа”, советниците на ДУИ и нивните партнери  СДСМ, НДП и ДСР гласаа против предлог-одлуката за доделување на субвенции во висина од 500.000 денари на ова  претпријатие, наменети за плаќање на електрична енергија, како последица од тоа ЕВН им ја исклучи струјата и салата остана во мрак.“, стои во реакцијата од локалната самоуправа на Гостивар.