Фирма од Врапчиште ќе одгледува канабис за медицински цели

Компанија од Врапчиште доби потврда од Владата на Република Македонија дека ги исполнува условите да влезе во бизнисот со одгледување на канабис за медицински цели.

„На денешната седница на Владата, министрите ја разгледаа и ја прифатија информацијата за исполнетоста на условите (простор, опрема и кадар) на Друштвото за производство, трговија, транспорт и услуги Ф&М 2017 ДОО Експорт – Импорт, во село Врапчиште, Гостивар за вршење на дејност со одгледување на канабис за медицински цели со предлог – одлука“, стои во владината информација.

Во Македонија маслото од канабис во медицински цели се користи за лекување на малигни заболувања. мултиплекс склероза, епилепсија и ХИВ. Измените на Законот со коишто се дозволи одгледување на канабис за медицински или научни цели беа донесени во март 2016 година. Канабисот или популарно наречен марихуана, можат да го одгледуваат само фирми кои ќе добијат лиценца за таа намена. Тие се должни да имаат обезбедено соодветен простор, површини или земјиште за одгледување, за сушење и складирање.