Надлежните со совети како да ги заштитите миленичињата и другите животни од жештините

Високите температури за секое животно претставуваат голем стрес кој може да се манифестира со намалено консумирање на храна, зголемена потреба за вода, намалено производство на млеко и слаб прираст, предупредуваат од Агенцијата за храна и ветеринарство.

Надлежните потсетуваат дека симптомите на сончаница и тополтен удар се манифестираат во облик на забрзано и плитко дишење, несигурен од (тетеравење), изразена зголемена телесна температура, забрзан пулс, исплашен поглед, зголемена жед, анурија, тикови и грчеви на мускулите. Советите се доколку се забележат такви симптоми кај животните, потребно е итно да се реагира: животното да се смести во ладовина или во разладена просторија, каде има доволно количество на воздух, да му се даде доволна количина на свежа вода, а телесната температура да се намали со туширање/прскање со умерено ладна вода, или со покривање на главата и вратот со ладна и влажна крпа но, треба да се внимава ладењето на животното да не биде премногу брзо.
Сопствениците на домашни миленици мора да се придржуваат на неколку правила како би спречиле несакани последици од топлотен удар, наведуваат од Агенцијата. „Прво и основно правило е да не се оставаат домашните миленици во затворен автомобил кој е директно изложен на сончевите зраци, да се избегнуваат прошетки на домашните миленици во текот на најтоплиот период од денот“.
За да се спречат несакани појави како резултат на високите температури се советува:
-На животните да им се обезбеди доволна количина и постојана достапност до свежа и чиста вода;
-Животните да се држат во проветрени простории (отворање на сите прозори и употреба на вентилација како и уреди за разладување);
-Да се внимава на населеноста (густината) на сместување на животните во објектите
-Животните треба да бидат заштитени од директните дејства на сончеви зрачења односно на испустите да има натстрешници или природни ладовини. Излегувањето на животните да се врши во раните утрински часови или вечерните часови;
-Транспортот на животни да се организира во раните утрински часови или вечерни часови кога температурите се ниски;
-Животните кои се наменети за работа да се користат во раните утрински часови или вечерните часови кога температурите се ниски.